“Aşıq Şəmşir” Mədəniyyət Ocağı “İpək yolu” Beynəlxalq Gənclər Forumunda Azərbaycanı təmsil edib
Çində “İpək yolu ölkələrində yaradıcılıq və mədəni irs” mövzusuna həsr edilmiş beynəlxalq gənclər forumu keçirilib. Tarixi “İpək yolu” üzərində yerləşən 51 ölkədən gənclərin qatıldıqları forumda Azərbaycanı “Aşıq Şəmşir” Mədəniyyət Ocağı İctimai Birliyinin nümayəndəsi Fazil Qasımov təmsil edib.
İctimai Birlikdən AZƏRTAC-a bildiriblər ki, forum UNESCO-nun Pekin ofisi və Çinin UNESCO məsələləri üzrə Milli Komissiyası tərəfindən təşkil edilib. Forum iştirakçıları bir həftə ərzində Çinin Çanşa və Nankin şəhərlərində tarixi “İpək yolu” mədəni irsinin qorunub saxlanmasında və yaradıcılığın təbliğində gənclərin rolunu müzakirə ediblər. Fazil Qasımov Azərbaycan xalqının mədəni irs nümunələri barədə forum iştirakçılarına geniş məlumat verib, tarın müşayiəti ilə Azərbaycan xalq mahnılarını ifa edib. Dinləyicilər Azərbaycan musiqisinin ecazkarlığından və xalqımızın mədəni irsə bağlılığından təsirləndiklərini ifadə ediblər. Forum çərçivəsində Nankin İncəsənət İnstitutunun rəhbərliyi ilə “Aşıq Şəmşir” Mədəniyyət Ocağı İctimai Birliyi arasında UNESCO layihələrində əməkdaşlığın perspektivləri müzakirə edilib, İctimai Birliyin UNESCO-da akkreditasiyası təcrübəsi barədə məlumat verilib. Görüşdə birgə əməkdaşlığın Çin ilə Azərbaycan arasında mədəni əlaqələrə töhfə verəcəyi ifadə olunub.
Nankində keçirilən “VIII Dünya Tarixi və Mədəni Şəhərlər Sərgisi”nin açılışına qatılan Fazil Qasımov UNESCO Dərnəkləri, Mərkəzləri və Assosiasiyaları Dünya Federasiyasının (WFUCA) prezidenti Dhirendra Bhatnagar ilə görüşüb. Görüşdə Azərbaycanın UNESCO ilə səmərəli əməkdaşlığının dünya mədəni irsinin qorunmasına töhfə verdiyini vurğulayan İctimai Birliyin nümayəndəsi Federasiyanın Azərbaycanda nümayəndəliyinin açılmasının zəruriliyini diqqətə çatdırıb. Fazil Qasımov “China Daily” və “People’s Daily” dövlət xəbər agentliklərinin jurnalistləri ilə keçirilən görüşlərdə Azərbaycanın mədəni irsini tanıtmaqla yanaşı, ölkəmizin “İpək yolu” ölkələri arasında nəqliyyat infrastrukturunun qurulması istiqamətində həyata keçirdiyi layihələr, o cümlədən Bakı-Tbilisi-Qars dəmiryolu və Beynəlxalq Transxəzər Nəqliyyat Marşrutu barədə ətraflı məlumat verib, ölkələrimiz arasında mədəni, iqtisadi əlaqələrin genişləndirilməsində medianın əvəzsiz rolunu vurğulayıb. Xəbər agentliklərinin rəsmiləri, paylaşılan məlumatlar əsasında Çin mediasında Azərbaycanın mədəni irsi və ölkəmizin “Bir kəmər və bir yol” təşəbbüsünə töhfələri barədə yazılar dərc edəcəklərini bildiriblər. UNESCO-nun təşkilatçılığı ilə baş tutan “İpək yolu” Beynəlxalq Gənclər Forumu 2019-cu ildə Berlində, 2020-ci ildə isə Bakıda keçiriləcək.
AZƏRTAC
