''Atam Kəlbəcər həsrəti ilə yaşadığı üçün belə şeyləri özünə ar bilib...'' Dilqəm Əsgərovun oğlu...
“Atam Kəlbəcərin işğalından sonra bizim evimizdə nə ad günü, nə də toy çaldırmayıb”
Kalbajar.com xəbər verir ki, bunu Moderator.az-a açıqlamasında erməni girovluğunda saxlanılan Dilqəm Əsgərovun oğlu Kürdoğlu Əsgərov deyib. Bu gün Kürdoğlu Əsgərovun 28 yaşı tamam olur, amma o, doğum gününü qeyd etmir. Bir müddət öncə özünə “çalğısız toy” edən K.Əsgərov atası azad edildikdən sonra toy edəcəyini bildirmişdi:
“Bu gün 28 yaşım tamam olur, amma doğum günümü keçirmirəm. Atam Kəlbəcərin işğalından sonra bizim evimizdə nə ad günü, nə də toy çaldırmayıb. Kəlbəcər həsrəti ilə yaşadığı üçün belə şeyləri özünə ar bilib. Ona görə də atamın doğum günlərimdə mənə nəsə hədiyyə etməsi yaddımda qalmayıb. Mən Kəlbəcərdən gələndə iki yaşım var idi”.
K.Əsgərov atasının azad edilməsi istiqamətində görülən işlərdən də danışıb:
“Dövlətimiz, Əsir və itkin düşmüş, girov götürülmüş vətəndaşlarla əlaqədar Dövlət Komissiyası, Avropa Məhkəməsi, Vətəndaş cəmiyyətinin gənc müdafiəçiləri öz müstəvisində iş aparır. Ümid ancaq ölkə başçısına qalıb. Bizim Rusiyada və digər xarici ölkələrdə yaşayan soydaşlarımız var ki, onlar da atamın azad edilməsi üçün əlllərindən gələni etməyə çalışırlar. Atamın azadlığı üçün əllindən gələni əsirgəməyən hər bir insana öz təşəkkürümü bildirirəm”.
