“Bu bəyanat ABŞ-ın tarixinə qara hərflərlə yazılacaq” – Deputat Aqil Məmmədov
ABŞ prezidenti Cozef Baydenin 24 aprel çıxışında “erməni soyqırımı” ifadəsini işlətməsi yalnız erməni lobbisinə seçkilərdə verdiyi vədlə bağlı deyil. Bu eyni zamanda, ABŞ-Türkiyə münasibətlərinə vurulan zərbədir. Bu bəyanat ABŞ-ın dövlət siyasəti tarixinə qara hərflərlə yazılacaq”.
Milli Məclisin deputatı Aqil Məmmədov ABŞ prezidentinin məlum bəyanatına münasibət bildirərkən bu fikirləri söyləyib.
A.Məmmədov bildirib ki, bu və bundan əvvəl yalançı “soyqırımı tanıma” qərarları yalnız siyasi məna daşıyıb: “İndiyə qədər müxtəlif ölkələrdə verilmiş bu kimi bəyanatlar tarixi faktlara əsaslanmayıb, Türkiyəyə təzyiq vasitəsinə çevrilib. Türkiyə ən yüksək səviyyədə dəfələrlə bu mövzuda Osmanlı arxivlərini açmağa hazır olduğunu bəyan edib. Lakin, nə Ermənistan, nə də onun havadarları tarixçilərin bu hadisələri araşdırmasında maraqlı olmayıblar. Çünki, məqsəd olmamış bir soyqırımı araşdıqmaq deyil, bu təbliğatdan Türkiyəyə qarşı istifadə etmək olub”.
Millət vəkilinin sözlərinə görə hər zaman olduğu kimi bütün Azərbaycan xalqı Türkiyənin yanındadır: “ABŞ prezidentinin məlum bədnam bəyanatından dərhal sonra Azərbaycan Prezidenti Türkiyə Prezidenti ilə danışdı və Azərbaycan dövlətinin, xalqının dəstəyini ifadə etdi. Bizim birliyimiz bizim gücümüzdür. Bu birliyi hər zaman təmin etməklə, qarşımıza çıxan əngəlləri birlikdə həll edə biləcəyik”.
