Doğum günün mübarək, vətən oğlu!
"Kədərdə bulunur, dərdli Kəlbəcər,
Dərbədər düşmüsən, ay vətən oğlu.
Tanrıdan, taledən, yoxsa Fələkdən,-
De, kimdən küsmüsən, ay vətən oğlu?.."
Bir parçasını təqdim etdiyim bu şeirin müəllifinin kim olduğunu bilmirəm, amma ona təşəkkür edirəm. Çünki haqqında söhbət açmaq istədiyim insan, bu bəndin misralarında deyildiyi kimi, Kəlbəcərin həsrəti ilə yaşayan bir vətən oğludur.
Əvvəlcə həmkarı Xalidə Xalidin onun barəsində dediklərindən misal gətirək:- "2013-cü ilin aprelində İranın "ETTELAAT"-ı tərəfindən Təbrizdə həbs edilmişdim. Azad olunub qayıdanda haqqımda ilk yazılan onun “Ay İran, ay İran” adlı məqaləsi oldu. Kaş biləydiz, bu məqalə mənim üçün nə boyda mənəvi təskinlik idi. Onda bir daha əmin oldum ki, kişilik sözlə deyiləsi deyil, kişilik əməllə ölçülür". Azərbaycan jurnalistikasının "generalı" Qulu Məhərrəmli isə onu belə dəyərləndirir:- "Yaxşı kişilərdəndir, konkret və vacib bir işlə məşğuldur. Hay-küyçü deyil, səmimi və dürüst şəxsdir"…
Özünü türkçülüyün təbliğinə həsr edib. Güney Azərbaycan mövzusu isə onun yaralı yeridir. Bəlkə də bundan irəli gəlir ki, "Türküstan" adlı qəzet və eyni adlı sayt da yaradıb. Bu kütləvi informasiya vasitələrinin kifayət qədər oxucusu da var.
Xidmətləri cavabsız qalmayıb, Türksoy və Beynəlxalq Türk Akademiyasının mükafatları ilə təltif edilib. Necə deyərlər, bu başlanğıcdır. Həyat isə davam edir, qarşıda onu yaşanmamış neçə-neçə illər gözləyir. Aprelin 6-da 43 yaşı tamam olur. Ana dilində danışarkən bir sıra türk sözlərindən istifadə edən, Amerika qitəsinin ilk sakinləri sayılan "qızıl dərili"lərin vətənindən onu təbrik edir, ona möhkəm can sağlığı, firəvan həyat, yaradıcılıq uğurları arzulayırıq.
Doğum gününüz mübarək, Aqil Camal!
Elman Eldaroğlu,
ABŞ, Miçiqan
