Kəlbəcər elinə böyüt itki, daha bir ziyalımız haqqın dərgahına qovuşdu
Hacıyev Qalib Məmməd oğlu, 04 sentyabr 1957-ci ildə Kəlbəcər rayonunda həkim ailəsində anadan olmuşdur. 1974-cü ildə Kəlbəcər şəhər 2 saylı orta məktəbi qızıl medalla bitirmişdir.1975-ci ildə Bakı Dövlət Universitetinin hüquq fakultəsinə daxil olmuş,1980-cu ildə Bakı Dövlət Universitetinin hüquq fakultəsini bitirmişdir.Elə həmin ildən təyinatla Azərbaycan Respublikası Ədliyyə Nazirliyi Məhkəmə Ekspertizası Mərkəzin göndərilmiş, 1980-ci ildən 2000-ci ilədək həmin Mərkəzdə müxtəlif vəzifələrdə çalışmaqla Şöbə rəisi vəzifəsinədək yüksəlmişdir.
Azərbaycan Respublikası Prezidentinin sərəncamına əsasən 2000-ci ildən 2007-ci ilədək Əli-Bayramlı Rayon Məhkəməsinə hakim, 2007-2017-ci illərdə Qobustan Rayon Məhkəməsinin sədri vəzifəsinə təyin edilmiş və 10 il müddətinə Qobustan Rayon Məhkəməsinin sədri vəzifəsində işləmişdir. Hüquq elmləri namizədidir. 2017-ci ildən təqaüdə çıxmışdır.
Qalib Məmməd oğlu Hacıyev çətin və şərəfli peşə fəaliyyətində daim vicdanının səsi ilə hərəkət etmiş, qanunun aliliyinə əsaslanıb, həmişə haqqın tərəfində olmuşdur. Çıxardığı məhkəmə hökmlərində, qərarlarında, qətnamələrində həmişə ədalət prinsipini rəhbər tutmuşdur. Həmkarları, tanışları arasında səmimi və nüfuzlu şəxs imicinə malik peşəkar hüquqşünas kimi tanınırdı. İşlədiyi rayon ictimaiyyəti arasında xüsusi hörmətə, yüksək insani keyfiyyətə malik idi. Vətənə, torpağa çox bağlı insan idi, arzusu doğulub boya başa çatdığı Kəlbəcərimizi, ümumilikdə Qarabağımızı azad görmək idi.
14 aprel 2020-ci il tarixdə qəflətən ürək çatışmamazlığı xəstəliyi diaqnozu ilə Qalib Hacıyev çox erkən yaşlarında haqq dünyasına qovuşdu. Qalib müəllimin vaxtsız vəfatı ailə üzvləri ilə bərabər həmkarlarını, xüsusilə dostlarını və rəhbərlik etdiyi kollektivi çox sarsıtdı. İki övladı, 1 nəvəsi var.
Allah rəhmət eləsin!!!
Kalbajar.com olaraq mərhumun ailəsinə dərin hüznlə başsağlığı verir , Allahdan rəhmət diləyirik. Məlumatları göndərdi mərhumun yaxın dostu Mahir Həsənov.
