KƏLBƏCƏRLİ SEÇİCİLƏRİN NÖVBƏTİ QƏBULU KEÇİRİLİB
“Azərbaycan Dəmir Yolları” Qapalı Səhmdar Cəmiyyətinin sədri, 123 saylı Kəlbəcər Seçki Dairəsindən Milli Məclisə deputat seçilmiş Cavid Qurbanovun tapşırığına əsasən kəlbəcərli seçicilərin növbəti qəbulu keçirilib.
Qəbulu aparan, Millət vəkilinin nümayəndəsi Həbib Misirov bildirib ki, ölkə başçısının tapşırığına əsasən dövlətin ali struktur rəhbərləri, eyni zamanda Milli Məclsin deputatları mütəmadi olaraq qaçqın və məcburi köçkünlərin qayğıları ilə maraqlanır, onların problemlərinin həlli ilə məşğul olurlar.
Həbib Misirov seçicilərin nəzərinə çatdırıb ki, dövlət başçısının 1 iyul 2004-cü tarixli sərəncamı ilə "Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı" təsdiq edilib. Bu proqramın həyata keçirilməsi nəticəsində əvvəllər acınacaqlı şəraitdə yaşayan qaçqın və məcburi köçkünlərimiz müasir yaşayış komplekslərinə, rahat mənzillərə köçürülüblər. O, bildirib ki, Ulu Öndər Heydər Əliyevin qaçqın və məcburi köçkünlərə göstərdiyi diqqət və qayğı bu gün dövlət başçısı möhtərəm İlham Əliyev və ölkənin Birinci Vitse-Prezidenti Mehriban xanım Əliyeva tərəfindən davam etdirilir.
Daha sonra qəbula gələn seçililərin problemləri dinlənilib, bəzi seçicilərin problemləri yerində həll edilib, bəzi məsələlərin həlli istiqamətində isə müvafiq işlərin görüləcəyi diqqətə çatdırılıb.
Qəbulda iştirak edən seçicilər ölkə rəhbərliyinin qaçqın və məcburi köçkünlərə göstərdiyi diqqət və qayğını yüksək qiymətləndirdiklərini bildiriblər. Eyni zamanda qeyd ediblər ki, Millət vəkili Cavid Qurbanov seçicilərinin etimadını doğruldaraq hər zaman onların problemlərini diqqət mərkəzində saxlayır, bu problemlərin həlli üçün əlindən gələni edir. Kəlbəcərli seçicilər əminliklərini ifadə ediblər ki, ölkə başçısının apardığı məqsədyönlü siyasət nəticəsində onlar doğma torpaqlarına dönəcəklər.
