Rəsul Murovdağlı dünyasına səyahət



Güldür Ay Allah, ümidim bir sənə qalıb . İllərdir gülməyən üzümü güldür . Könlümdə kədərdən dərya yaranıb , Yol salıb gözümə gözümü güldür . Vətən girov qalıb, el nalə çəkir, Tərtər cuşa gəlib, sel nalə çəkir, Saqqalım ağarır, tel nalə çəkir, Pünhan tüstülənən közümü güldür. Elə kövrəlmişəm, elə dolmuşam, Həsrətin şaxtası vurub solmuşam. Bütöv yurdum deyib qaçqın olmuşam , Yarımçıq kəsilən sözümü güldür. Ayrılıq yelidi üstümdən əsən, Qəlbimin sevincin doğrayan, kəsən. Ahımdan, nələmdən kövrəlib küsən, Bezib uzaq qaçan dözümü güldür. Rəsulam dərdimin yoxdu tanımı, Hicran zəli kimi sorur qanımı. Ya öldür biryolluq qurtar canımı , Ya mənə yad olan özümü güldür .


QARDAŞIM Dünyada dünyalıq qalmayıb daha, Dolanır başında bəla, qardaşım. Tülkü quyruğuyla əm(i)rlər verir, Başını soxubdu kola, qardaşım. . Uca zirvələrə "kəf gəlir" yamac. Nəzər çoxalıbdı gözdən uzaq qaç. Nəzir qoy ağaca, budaqdan sap aç,- Götür barmağına dola, qardaşım. . Qara çıraq olub hicranın şamı,- Piltəsi arzular, ürəkdi camı. Bəşərin ağzının qaçıbdı tamı, Salıbdı meylini kala, qardaşım. . Rəsulun ümidi tuş gəlib daşa, Könlü nökər olub, dərdləri paşa. Zamanla, dövranla dil tapıb yaşa, Birtəhər yola ver, yola, qardaşım


DƏRDLƏRİM QOL AÇIB KƏLBƏCƏR DEYİR Evim gorum olub, dörd divar sıxır, Dərdlərim qol açıb Kəlbəcər deyir. Körpə arzularım düşüb dumana, Gözümdən yol açıb Kəlbəcər deyir.

Xəyalım ürpənir dərin yuxuda, Tapmır itirdiyi yerin yuxuda. Balam da səksənir şirin yuxuda, Hər gecə dil açıb Kəlbəcər deyir.

Əkdiyim bənövşə sözümə bənzər, Vərəqlər üstündə düzüm-ə bənzər, Boynu bükük qalıb özümə bənzər, Hər bahar gül açıb Kəlbəcər deyir.

Rəsulun könlündə qəm qurub dəyə, Birtəhər yaşayır yurd deyə-deyə. Yenə dilənçitək yalvarır göyə, Allaha əl açıb Kəlbəcər deyir.


HƏR GÜNÜM QARLI QIŞ, ÜŞÜYÜRƏM

Hər gün Xocalıyam, hər gün faciə, Yaramı tuturam əlim üşüyür. Hər gün öz qanımı yalayıram mən. Dodağım yarılır, dilim üşüyür.

Hər gün çevrilirəm donan körpəyə, Arzusu süngüdə solan körpəyə, Dönürəm odlarda yanan körpəyə, Yanıb kül oluram, külüm üşüyür.

Hər gün kövrəlirəm, hər gün doluram, Dünyada dünyasız, nakam qalıram, Anamın bətnində uşaq oluram, Anamın bətnində ölüm üşüyür,

Hər gün qismətimdə min ağrı, acı, Belimə bağlayır qızarmış sacı. Körpə bacıların kəsilən saçı, Namusdan ayrılan telim üşüyür.

Hər gün çan çəkirəm, üzülür canım Rəsulam, qan üstə süzülür qanım. Xocalı dərdindən Azərbaycanım, Xocalı adında elim üşüyür.

Rəsul MUROVDAĞLI


11 views

BİZ XOCALINI
UNUTMADIQ!
25-26 FEVRAL
1992

  • 613 nəfər qətlə yetirilib, o cümlədən:

    • 63 uşaq;

    • 106 qadın;

    • 70 yaşlı.

    • 8 ailə tamamilə məhv edilib;

    • 25 uşaq hər iki valideynini itirib;

    • 130 uşaq bir valideynini itirib;

  • 487 yaralı;

  • 1275 girov;

  • 150 itkin düşüb.

BİZ AĞDABANI
UNUTMADIQ!
8 APREL
1992

  • 130 ev yandırılmış, o cümlədən:

    • 779 nəfər qeyri-insani işkəncələr verilmiş;

    • 67 nəfər qətlə yetirilmiş;

    • 8 nəfər 90-100 yaşlı qoca;

    • 2 nəfər azyaşlı uşaq;

    • 7 nəfər qadın diri-diri odda yandırılmış;

    • 2 nəfər itkin düşmüş;

    • 12 nəfərə ağır bədən xəsarəti yetirilmişdir

BİZ BAŞLIBELI 
UNUTMADIQ!
18 APREL
1993

  • 18 gün gizli yaşaya bilmişlər, o cümlədən:

    • 27 qətlə yetirilmiş;

    • 19 nəfə girov götürülmüş;

    • Sağ qalan 30 nəfər isə sığınacaq yerləri kimi kahaları seçiblər

    • Onlar 113 gündən sonra – iyulun 17-də sığınacağı tərk edərək yalnız gecələr hərəkət etməklə gizli dağ yolları vasitəsilə Ermənistan ordusunun mühasirəsindən çıxa biliblər.

            Copyright  © 2020        |       www.kalbajar.com        |      Əlaqə :(+994 55) 585-55-58     |     Email : kalbajar93@hotmail.com        |      Development by Rashad Abdullayev